Conceyu Abiertu

Conceyu Abiertu propón al ayuntamiento de Sieru crear un “Bancu de medicines” pa l’usu de tolos vecinos del conceyu; Esti Bancu sedría un llugar onde los y les sierenses puean dexar les sobres de medicines que tengan nes sos cases ya onde poder dir a esta “farmacia pública” nel casu de necesitar dalguna de les referencies d’esti stock.

Esta medía, xunto cola sensibilización ciudadana quier paliar los problemas que la cabera norma de pagu de medicines, que va afectar a un sector per grande de la nuesa población, amás de facer un sistema alternativu, solidariu y participativu sobre’l usu de medicines.

Les sobres de melicines que toos y toes tenemos nes nueses cases que puén ser el resultau de delles circustancies, puén ser el sofitu pa facer una “farmacia alternativa”, que cola xestión d’un farmacéuticu y el control del médicu podemos coyer de baldre la cantidá necesaria de dosis.

Los paraos y paraes de la cuenca’l Nalón organizaos baxo la “Plataforma de paraos” vienen de facer una riestra de propuestes a desendolcar pol Ayuntamientu de Llangréu, énte les qu’atopamos el tresporte público de baldre o’l pagu del mínimu en dalgunes tases municipales pa quienes lleven más de dos años en paru, como midíes que, dende la Casa Conceyu, ayuden a ameyorar la situación na que s’atopen les miles de persones en situación de desemplegu, nel nuesu conceyu y nos averaos.

Dende Conceyu Abiertu por Llangréu queremos amosar el nuesu sofitu a los paraos y paraes nes sos vindicaciones que, independientemente de propuestes concretes, son llexítimes y asoleyen la demanda qu’esiste énte la ciudadanía pa que l’Ayuntamientu seya un organismu muncho más enfotáu na situación social de lo que ta anguaño, onde sólo importen los intereses específicos del PSOE y la so rede clientelar texía a lo llargo los años.

El gobiernu municipal nun permite facer copia del borrador de los presupuestos a los conceyales de la oposición

Dende Conceyu Abiertu por Noreña consideramos un déficit democráticu inxistificable’l fechu de que dende’l gobiernu se decidiere nun permitir a los conceyales de la oposición facer copia del borrador de presupuestos al que tan sólo puén acceder a él los miembros del plenu municipal de 8 a 15h na sala de conceyales.

Dende Conceyu Abiertu defendemos unos presupuestos participativos, onde’l pueblu de Noreña puea ser parte activa na so elaboración. Nesti sen, recordamos, por exemplu, que nel conceyu vecín de Siero un gobiernu tamién del Psoe ellaboró los presupuestos de forma participativa mentantu en Noreña, un alcalde del mismu color políticu nun solo nun permite la participación ciudadana sinon que impide facer copía del documentu a los propios conceyales de la oposición.

Desixe la creación d’un Conseyu Municipal de Deportes pa democratizar la xestión esportiva

Énte l'anuncia de la Conceyalía de Deportes de revisar les fórmules de pagu y aplicar una xubida de les tases pol usu de les instalaciones deportives, Conceyu Abiertu por Noreña quier dar conocencia del so puntu de vista sobre la política deportiva y l'usu de les instalaciones:

- Consideramos necesaria la formación de un Conseyu Municipal de Deportes onde tean representaes les asociaciones deportives, amás de la corporación municipal, y que sirva p’ameyorar la xestión deportiva de Noreña d’una forma participativa, tomando la pallabra los propios clubes y los deportistas, convirtiéndolos n’axentes activos de la política deportiva del conceyu.

- Refugamos la situación actual na que los clubes deportivos gasten bona parte de la subvención municipal –yá probe abondo- en pagar les instalaciones. Dende Conceyu Abiertu por Noreña tamos por fórmules que garanticen l'usu de les instalaciones de forma gratuita a les asociaciones deportives.

La plantilla de la empresa concesionaria de les rutes d’autobús qu’enllacen Mieres, L.lena y Uviéu cunta anguaño con impagos nos salarios de Febreru, Marzu y una paga estraordinaria, asina como otros atrasos, hores estres y festivos trabayaos que s’averen a los 100.000 euros de deuda.

La situación nun ye nueva nesta compañía, que nel añu 2009 obligó a los y les trabayadores a entamar una fuelga que duró diez meses col enfotu d’ameyorar les sos condiciones llaborales, polo que dende Conceyu Abiertu por Mieres queremos solidarizanos cola plantilla d’ésta empresa na so llucha por que se cumplan les condiciones llaborales pautaes, les que-yos correspuenden llexítimamente.

D’otru lláu, dende ésti movimientu políticu queremos denunciar la pasividá de les instituciones públiques y organismos como’l Consorciu de Tresportes d’Asturies, que nun actúen énte los abusos empresariales de los dueños d’Enferbus calteniendo les llinies esplotaes pola empresa y, polo tanto, los ingresos, que queden nes manes del empresariu, y nun aporten a los y les trabayadores.