Conceyu Abiertu

Conceyu Abiertu va participar nes eleiciones del prósimu 22 de mayu a la Xunta Xeneral d’Asturies presentando candidatures nes tres circunscripciones eleutorales nes que se dixebra’l país. Asina, pol centru el so candidatu va ser Mariu Arbesú (Noreña, 1978). Arbesú tien fechos estudios de Maxisteriu y anguañu trabaya nuna empresa del sector del vidriu; foi cabezaleru del movimientu xuvenil independentista asturianu y candidatu por Andecha Astur a l’alcaldía Noreña delles vegaes y participa activamente en movimientos sociales y culturales del país. Pol occidente’l candidatu ye Antón Fuertes (Cangas del Narcea, 1948), llicenciáu en Socioloxía, ye direutor del Departamentu d’Estudios y Formación de la Confederación Xeneral de Pequeñes y Medianes Empreses del Estáu Español (COPYME) y ún de los fundadores del Conceyu d’Asturies en Madrid. Por último, pol oriente’l cabezaleru ye Daniel Cueli (Piloña, 1978), diplomáu en Maxisteriu y llicenciáu en Pedagoxía y qu’anguañu trabaya comu Axente de Desarrollu Local.

 Nes eleiciones municipales, Conceyu Abiertu presenta candidatura en nueve conceyos: Uviéu (onde la persona qu’ocupa’l primer llugar de la llista ye Rafael Trabanco), Grau (Fernando Romero), Sieru (David Fernández), Llangréu (Paloma García), Samartín del Rei Aurelio (Xulio Llaneza), Mieres (Paula Martín) y Villaviciosa (Xandru Vega). Amás, en Noreña preséntase baxo la fórmula d’agrupación d’eleutores comu Conceyu Abiertu por Noreña (siendo’l candidatu Pablo Pérez) y en Xixón dientro de la coalición Conceyu d’Unidá Popular de Xixón, xunto a Izquierda Anticapitalista, Frente de la Izquierda ya independientes, ocupando’l representante de Conceyu Abiertu, Javier Cubero, el puestu númberu 3 de la llista.

Share Link: