Conceyu Abiertu

Patrimoniu solicita información al Ayto “sobre quién llevó a cabu'l desmontaxe de la ponte de ferrocarril d'El Rebalde en Noreña pa riquir el cumplimientu del alcuerdu del Plenu Municipal de fecha 26 de payares de 1999 relativu a la reconstrucción de los restos de la ponte”  a lo que va responder que “nun sabe nada”.

La propuesta de Conceyu Abiertu por Noreña sobre la ponte de ferrocarril del Rebalde nun foi incluyida na orde del día de la última comisión de Cultura per decisión del Alcalde, que ye quién decidi lo que se trata y lo que non, dando amueses nuevamente del so talante democrático. De toes formes, CA NOREÑA espunxo la so propuesta de pallabra nel puntu “PONTE EL REBALDE. INFORMACIÓN”.

Pidíase:

- Acordar el cumplimientu de tolos alcuerdos plenarios de 26-11-1999, al respective de la ponte d’El Rebalde, el so desmonte y la so posterior reconstrucción na villa.

- Proceder de forma urxente, al rescate d’esti elementu patrimonial de suma importancia y al treslladu de les sos pieces a dependencies muncicipales afayaíces pa savalguardalu en tolos sentíos (robu, deterioru,…) y asegurar la so conservación.

- Ellaborar un Informe sobre l’estáu de conservación, qu’incluya un recuentu de les distintes pieces numeraes asina como de les posibles incidencies que s’alcuentren nesti procesu previu d’almacenamientu.

- Estudiar les posibilidaes de reconstruición, los costes y posibles víes de financiación asina como propuestes d’ubicación que cumplan l’oxetivu principal de la so contestualización y la so accesibilidá pal disfrute de los vecinos y vecines y de toles persones que mos visiten.

Na última Comisión de Cultura alcordóse responder a la solicitú de la Comisión Permanente del Conceyu de Patrimoniu Cultural d'Asturies  que nun sabe nada sobre quién fixo'l desmontaxe de la ponte. A les entrugues de CA NOREÑA sobre quién ordenó depositar les pieces nuna finca municipal, respondióse igualmente que “nun se sabe”. Consideramos que l’Ayuntamientu quier desentendese de la so responsabilidá nel casu d'abandonu de patrimoniu denunciáu sol paragües del desconocimientu,… esviando l'atención de la cuestión central: el Conceyu incumple sistemáticamente l'alcuerdu plenariu de 26-11-1999 que dexa la ponte del Rebalde en situación de peligru y abandonu. 

Paez evidente, a la vista del alcuerdu plenariu, qu'el desmontaje realizar el Conceyu. La moción aprobada “nos mesmos términos en que foi redactada” empieza con un claru “Desmóntese la citada ponte, y previa numberación de les distintes pieces que lo conformen, sía treslladáu a la nuesa villa, onde una vegada reconstruyíu y allugáu…”. Por ello, si'l Plenu alcuerda'l so desmonte y numberación, ye de suponer qu'el Aytu ye quien fai'l desmontaje, más cuando la ponte diba ser destruyíu, y l'acción del Conceyu diba destinada a salvaguardalo. El depósitu de les pieces numberaes de la ponte, nuna finca de propiedá municipal, ye otra evidencia de que'l Conceyu ye quien desmonta la ponte y faise cargu de la so custodia de cara a la so reconstrucción en cumplimientu del alcuerdu plenariu, daqué que nunca llegó a asoceder. (Por si fora poco, antiguos trabayadores municipales asegúrennos que participaron nel desmonte de la ponte).

Amás tamién s'aliega dende l'equipu de gobiernu un desconocimientu de la titularidá de la ponte como un problema que torga'l montaxe y supónse que ye de Conseyería d'Infraestructures, qu'espropió a FEVE pa realizar  la nueva carretera, quien la tendría. Daqué que contrasta col procedimientu rellatáu enantes. Si diba destruyise y el Conceyu aprueba que se desmonte, numbere y reconstrúya suponse que podría faelo y nun tendría problemes de titularidá.  Sía que non, ante la falta de conocencia del Conceyu prácticamente de too lo relativo al procesu (magar que el actual alcalde yera en 1999 conceyal de Cultura o que l'arquiteutu siga siendo'l mesmu), vistu que 12 años dempués naide reivindicó la titularidá toa fai indicar que ye del Aytu.

De toes formes, la protección del patrimoniu esta percima de la titularidá y les alministraciones públiques tienen de salvar el patrimoniu anque tengan qu'ayenar. Nesti sentíu la Llei de Patrimoniu da la posibilidá “cuando la urgencia en la adopción de las correspondientes medidas lo aconseje, a ejecutar subsidiariamente las medidas que procedan, con cargo, en todo caso, a los responsables de la conservación del bien” (Articulo 31, sobre Ejecución subsidiaria). Abriendo la puerta a la posibilidá de reconstrucción de la ponte y si demuestra la titularidá d'otra entidá o institución, como FEVE o Infraestructures, faer que cuerran colos gastos. Sía que non, la Llei establez el deber de caltenimientu nel Art. 28, el Ayto ta en posesión de bienes integrantes del Patrimoniu Cultural y los propietarios, posesores y demás titulares de derechos sobre bienes “están obligados a conservarlos, cuidarlos y protegerlos debidamente para asegurar su integridad y evitar la pérdida y deterioro de su valor cultural”. Amás establez que “los poderes públicos velarán por el adecuado cumplimiento de esta obligación” y “se prohíbe la destrucción total o parcial de los bienes integrantes del Patrimonio Cultural de Asturias”.

Llega a duldase del valor de la ponte, construyíu en 1850, parte del trazáu orixinal del ferrocarril de Llangréu, resalvando lo establecío na Llei de Patrimoniu. La ponte nun hai dulda que forma parte del patrimoniu cultural d'Asturies. Na Llei de Patrimoniu, dientro del apartáu de Patrimoniu Históricu-Industrial, nel Art.76, nel apartáu 2.d., referierse a “las infraestructuras de comunicación marítima, por ferrocarril o por cable en desuso y las construcciones, maquinaria y material móvil a ellas asociados”. Establez coles mesmes na disposición transitoria tercera de “protección preventiva de bienes”, que queden sometíos  al réxime de los bienes incluyíos nel Inventariu del Patrimoniu Cultural d'Asturies los bienes susceptibles d'integralo mientres tea esta n'ellaboración, ente otros “las muestras más destacadas de la arquitectura y de la ingeniería moderna” y los “testimonios más reseñables de la historia industrial”. Precisamente esta disposición de protección preventiva amplióse en marzu d'esti añu, hasta'l 31 d'avientu de 2015. Asina, el pidimientu de solicitar a la Conseyería un informe sobre'l so valor, como s'alcordó nel famosu plenu de 26-11-1999, amás de ser una nueva salida escontra alantre, paeznos atrevío cuando'l so valor ye incontestable y ta establecíu por llei y cuando lo fundamental d'aquel alcuerdu plenariu, la reconstrucción de la ponte, nun lo ta cumpliendo'l Conceyu.

Como otru actu más de cara a la galería, el Conceyu va realizar un informe “somero” del estáu de conservación, ensin un desenterramientu de les pieces y treslláu a un llugar seguru, como solicitamos na nuesa propuesta. Consideramos qu'esti informe va tener poca utilidá, cuidao que les condiciones nes que s'atopen (amontonamientu, semienterramiento, maleza, vexetación…) torguen una valoración real, más si l'informe nun va ser realizáu por especialistes na materia. Lo suyo sería un informe independiente y podría solicitase a la conseyería qu'unvie un especialista, por exemplu. Tarrecemos que con esti informe somero” se busque una nueva salida de cara a safar responsabilidaes polítiques una vegada que la vía del “nun se sabe” escóse, siendo la posible nueva estratexa la supuesta imposibilidá de reconstrucción pol mala traza de los materiales…lo cual inda sería más grave dao que se trataría d'una destrucción del patrimoniu por inacción del Conceyu, al nun executar l'alcuerdu del Plenu Municipal pudiendo aumentar la gravedá de les posibles sanciones y por tantu les posibles multes.

Con tou ello, consideramos que nun hai escuses pa nun cumplir un alcuerdu plenariu más siendo l'actual equipu de gobiernu en parte herederu d'aquella corporación, perteneciendo tantu l'actual alcalde como la conceyala d'IDEAS parte del gobiernu de 1999 y que siguieron nel hasta l'actualidá, independientemente de les sigles que gobernaron en cada momentu. El non cumplimientu de los alcuerdos plenarios abre una peligrosa situación de rocea escontra'l cumplimientu de lo que s'apruebe nel plenu esta llexislatura yá que desgraciadamente esti casu nun ye l'únicu incumplimientu d'alcuerdos que se vien dando nos últimos años. Amás, si la inacción del Ayto y el non cumplimientu del plenu llevara a una destrucción de patrimoniu podría tener mayores consecuencies tocantes a les posibles sanciones económiques que la denuncia contra'l Conceyu en Patrimoniu pudieren traer.

Share Link: