Conceyu Abiertu denuncia l'usu de toponimia non oficial nel enllaz a l'autovía minera de Ferrera

Jan

2012

Escrito por Toño

- Nun se respeta la toponimia oficial ya invéntase “La Ferrera”.

- Conceyu Abiertu por Noreña va llevar l'asuntu al Plenu.

Ante la instalación de señalización toponímica nel enllaz de Noreña cola Autovía Minera Conceyu Abiertu per Siero y Conceyu Abiertu per Noreña quieren denunciar que nun se respeta la toponimia oficial, dándose'l casu que la oficial “Ferrera” se convierte en “La Ferrera”, apaeciendo amás “La Ferrera de Abajo” y “La Ferrera de Arriba”, en llugar de les denominaciones oficiales “Ferrera de Baxo” y “Ferrera de Riba”.

Esta toponímia ye la oficial del Conceyu de Siero dende 2009, BOPA, 11, VIII-2009 (https://sede.asturias.es/Asturias/descargas/toponimia/Siero.pdf) polo que ye surrealista que más de dos años más tarde nun se señalice respetando la toponimia oficial, llegando al esperpento d'inventar topónimos como “La Ferrera”. Dase'l casu que parte de la localidá de Ferrera pertenez al Conceyu de Noreña, siendo oficial el topónimu nesti conceyu dende 2007 (https://sede.asturias.es/Asturias/descargas/toponimia/NORENA.pdf ).

Por esta razón Conceyu Abiertu por Noreña, que cunta con representación nel Plenu Municipal va solicitar que'l Conceyu de Noreña asítiese y pida que se respete, como sería lóxicu, la toponimia oficial nes instancies que correspuendan y que contacte col Conceyu de Siero de cara a faer causa común. Fairalo yá en forma de ruegu nel Plenu que se cellebra mañana xueves 26.

Amás d'esto, na señalización del enllaz esisten erros más graves si cabo y los cartelos indicativos nun recueyen la forma oficial de la capital del Conceyu de Siero, “La Pola Siero”, señalizándose erroneamente “Pola de Siero”.

Conceyu Abiertu considera una chambonada la señalización y considera que los Conceyos tienen que tomar cartes nel asuntu de cara a que l'enllaz recueya la señalización correcta. Quiciabes si los responsables municipales tuvieren sollertes al desenvolvimientu de les obres y tuvieren comenenciudos na bona señalización de les localidaes, agora nun taríamos ante esta aberración, qu'amás xeneró indignación ente los vecinos noreñenses y sierenses de Ferrera.