Conceyu Abiertu

Presentó una propuesta al restu de formaciones col oxetivu d’intentar que s’apruebe por unanimidá prosimemente.

Conceyu Abiertu por Noreña presentó-yos al resto d’organizaciones polítiques del conceyu (PSOE, IPÑ, PP, FDLI, FAC, IDEAS) una propuesta d’Ordenanza municipal pal usu de la llingua asturiana nel Conceyu de Noreña pa que la puean estudiar y/o facer propuestes de cara a llevala a los órganos de decisión del conceyu prosimamente.

Conceyu Abiertu por Noreña espera poder reunise con representantes de toles organizaciones, de cara a recoyer les sos impresiones y propiciar l’aprobación d’una ordenanza por unanimidá. Sería la primera vez que Noreña se dote d’una normal llocal sobre la llingua propia del conceyu, se reconozan los drechos llingüísticos de tolos vecinos y vecines, se regule l’usu nel ayuntamientu y dalgunes midíes de promoción y normalización. Ye por ello que sería preferible aprobalo tolos grupos, siendo amás la llingua patrimoniu de tolos noreñenses independientemente de la so ideoloxía.

Mientres los últimos meses, en Conceyu Abiertu por Noreña venimos estudiando les ordenances sobre l’asturianu vixentes n’otros conceyos d’Asturies, de cara a llevar alantre esti puntu del nuesu programa ellectoral. La so necesidá volvió a vese claramente nel conflictu llingüísticu que se vivió en Noreña a finales del añu pasáu, cola negativa del alcalde a almitir les nueses mociones n’asturianu y el rechazu a una propuesta posterior de solución provisional, mientres nun se redactaben unes ordenances, lo que traxo el posicionamientu de la másima institución llingüística del país, l’Academia de la Llingua Asturiana, y d’asociaciones de defensa de la llingua y cultura asturianes.

Agora presentamos unes ordenances axunstaes a la llexislación vixente y asumible por tolos grupos municipales y pol propiu gobiernu municipal (PSOE-IDEAS). Nesti sentíu el PSOE tien aprobao ordenances d’esti tipu n’otros concejos asturianos. Cabe destacar, nestos tiempos de crisis, que les ordenances nun supondríen un coste económicu al Conceyu, dependiendo gran parte de les actuaciones de la voluntá política y que tres aprobala, diría poniéndose en práctica paulatinamente, según los medios disponibles.

Consideramos que l’aprobación de la ordenanza, amás de ser un actu de dignificación de la llingua y cultura asturianes, supon un necesariu avance democráticu. Ye por ello que facemos un llamamientu a toles fuerces polítiques a acabar con una situación predemocrática y a siguir costruyendo una Noreña más democrática.

Share Link: