Conceyu Abiertu

Intervención de Javier Cubero como voceru de Conceyu Abiertu nel actu políticu al final de la manifestación del Día la Nación Asturiana n'Uviéu. 

Bonos dies, enantes de cualisquier otra cuestión quiero agradecer en nome de Conceyu Abiertu a tolos presentes la so participación nesti manifiestamientu. Si bien n’Asturies corren malos tiempos dende hai años, y la verdá ye que sedría difícil calificar dalguna dómina como positiva, los que tan viniendo van ser tovía peores como bien sabéis, con una crisis económica global que se yuxtapón a la crisis estructural que vive la nuesa Patria.

Nesti nuevu escenariu históricu, yá tamos viendo cuales son les rempuestes que da la oligarquía española, un día, una nueva reforma llaboral que nos fai siguir involucionando haza la dictadura empresarial y la más absoluta desprotección de los trabayadores, otru día, sorpréndenos con una propuesta de modificación fondamente reaccionaria de la hasta agora irreformable Constitución postfranquista, y siempres van alcontrar otru día más pa siguir llindando entá más esos derechos y llibertaes civiles que tantu sangre, cárcel y sufrimientu costaron algamar. Y al empar asistimos a una reactivación social del más ranciu, escluyente y autoritariu nacionalismu españolista, amosandose una vegada más que'l Estáu español ye la principal ferramienta que tienen les elites pa la imposición de los sos particulares intereses de clase. Asina que yá sabemos cuala ye l'alternativa oligárquica: más neolliberalismu, más precariedá llaboral, más desigualdá social, más represión policial, y más españolismu.

El casu ye qu'esta deriva del estáu de les coses ye posible, ente otres razones, pola fonda fragmentación ya incomunicación ente toos aquellos que defendemos la posibilidá, asina como la necesidá, d'una sociedá distinta a l'actual. Por eso debemos enfotanos na articulación d'espacios d’alcuentru dende los cualos dir desendolcando ferramientes d’acción colectiva cola finalidá d'intervenir eficazmente na sociedá. Y precisamente nesa dirección munchos optamos por Conceyu Abiertu hai menos d'un añu como ferramienta pa la reconfiguración y revitalización d’esi Movimientu de Lliberación Nacional qu’Asturies precisa más que nunca pa avanzar haza una democratización plena y real, haza la materialización efectiva de la soberanía popular dende'l municipalismu, y l’Autodetermín como alternativa imprescindible pa poner fin a la subordinación estructural del País a proyectos contrarios a los nueso intereses como pueblu.

Nel llamáu “asturianismu” hai persones qu'afirmen, mui interesadamente en dalgunos casos, qu'en Conceyu Abiertu caltenemos posiciones maximalistes que nun se correspuenden cola sociedá asturiana, y que hai qu'optar polo qu'ellos denominen posibilismu institucional. Y énte esti tipu de discursos que busquen l'anulación d'un proyectu nidiamente tresformador y soberanista pa la nación asturiana, nós nun podemos permanecer en silenciu. De mano porque hai diferencies estratéxiques ya ideolóxiques que nun tienen que ver cola mayor o menor radicalidá del discursu sinón col modelu social y políticu al que se quier llegar. Dempués, porque Conceyu Abiertu nun ye un proyectu de máximos sinón de mínimos, pero d'unos mínimos nacionales y democráticos nel marcu d'una llínea política embobinada a la creación d'una Alternativa Soberanista dende la esquierda. Y pa finar porque la necesaria presencia institucional tien que venir acompañada tanto d'una coherencia programática nel trabayu diariu, y precisamente quien ta amosando que n’Asturies ye posible realizar otru tipu de política institucional, faciendo Patria dende’l Ayuntamientu como dende l'arena pública realizando aconceyamientos abiertos colos ciudadanos, ye l'agrupación llocal de Conceyu Abiertu por Noreña.

Nestos momentos Conceyu Abiertu nun ye l’Alternativa que precisa esti País pero precisamente esa Alternativa ye lo que nos años vinientes vamos elllaborar progresivamente al traviés del trabayu dende la base, dende los conceyos y dende los movimientos sociales. Asina ye como vamos dir definiendo a Conceyu Abiertu como proyectu d'unidá d'acción al llargu plazu dende la esquierda soberanista. Porque en política nun esisten nin los milagros nin les casualidaes. O se ta dientro de les estructures del poder, o se ta fuera intentando articular el contra-poder popular nel marcu d'una dinámica constante de rearticulación societaria y de movilización caltenible nel tiempu.

Munches gracies collacios y collacies.

¡Puxa Asturies llibre y soberana!

Share Link: