Pidimos el cumplimientu del alcuerdu de 1998 pa la construcción d'una 'U' en Noreña

Nov

2011

Escrito por Toño

Conceyu Abiertu por Noreña presentó nel rexistru del Ayuntamientu la siguiente moción pa dar cumplimientu al alcuerdu de 1998 pa la construcción d'una "U" de patinaxe y que, como otros munchos, entovía nun se cumplió.

ESPÓN:

Que pa Conceyu Abiertu por Noreña ye una prioridá que'l Conceyu cumpla los alcuerdos que'l Plenu Municipal aprueba y que estos nun queden en “sacu rotu”. Por ello, ye prioritariu dir cumpliendo los alcuerdos pendiemtes. Consideramos qu'esti cumplimientu de los alcuerdos ye básicu y normal nel funcionamientu de la institución.

Nesti sentíu, el Conceyu dexó de cumplir, ente otros, l'alcuerdu plenariu de 30 de xineru de 1998 sobre la construcción d'una U de patinaxe. Nesi Plenu tolos grupos con representación (PSOE, IX, PP y Centristes Asturianos) votaron unánimemente a favor de la moción presentada por Izquierda Unida, solicitando:

- La construcción d'una U de patinaxe, que s'escoyera pal so allugamientu un llugar céntricu, de bon accesu y con poco tráficu y que se cuntara, pal so diseñu y construcción, con persones que practiquen esti deporte.

Ye obvio que nestos casi 14 años nun se cumplió esti alcuerdu, quedando esta instalación deportiva escaecida y ensin executar magar la so reivindicación por distintes organizaciones, asociaciones y persones a lo llargo d'esti tiempu y a qu'en 1997 se recoyeran más de 500 firmes de vecinos y vecines. Amás, el que los mozos que patinaben y empecipiaron la llucha por consiguir esta instalación deportiva sían agora yá trentañeros y qu'inda nun vieren nin pudieren utilizar esa instalación magar la so aprobación en plenu, tien de faenos cavilar enforma.

Agora, años dempués, paeznos que ye'l momentu de reimpulsar el proyectu y cumplir con esti alcuerdu y esta delda del Conceyu colos vecinos y vecines. Faise necesariu, igualmente, l'estudiu de distintes posibilidaes d'equipamientos actuales, dao que en toos estos años los d'esti deporte, como ye normal, fueron evolucionando.

Por tou ello, SOLICITA:

L'aprobación nesta comisión y/o'l so alderique pa la so aprobación en Plenu Municipal si fuera necesariu de la siguiente moción:

- Avanzar nel cumplimientu del alcuerdu plenariu de 30/01/1998, referíu a la construcción d'una U de patinaxe en Noreña, nun llugar céntricu, de bon accesu y con poco tráficu, cuntando, pal so diseñu y construcción, con persones que practiquen esti deporte.

- Estudiar los nuevos equipamientos esistentes de cara a la construcción d'una instalación de patinaxe acorde colos tiempos y con proyección de futuru.