Conceyu Abiertu por Uviéu refuga'l recorte nel allumáu de les zones rurales

Nov

2011

Escrito por Toño

L'Ayuntamientu d'Uviéu vien d'entamar un "plan d'aforru" na zona rural consistente nel apagáu del allumáu público de bona parte de les zones rurales de magar la medianueche.

Dende la Casa Conceyu aseguren que col plan afórrense alrodiu de 150.000 Euros al añu, y qu'afeuta namái a caleyes y zones ensin cases, pero una vegada más dende Conceyu Abiertu por Uviéu tenemos que denunciar que nun se tuvo en cuenta la opinión de los habitantes enantes de tomar medida dala. El descontentu énte la inmensa mayoría de la población de les zones afeutaes ye más qu'evidente y comprensivu, debío a qu'una vegada más la zona rural del conceyu d'Uviéu vese afeutada pol recorte nos yá probetayos servicios municipales que reciben.

A priori dende Conceyu Abiertu por Uviéu nun refugamos una racionalización del allumáu público cola doble vertiente de, primero, aforrar perres cola fin de destinales a estayes sociales más necesaries y, segundo, amenorgar el consumu llétricu baxo una concencia de caltenibilidá y ecoloxía, pero creyemos imprescindible que seyan los vecinos de les distintes zones rurales los que decidan qué allumáu caltener y qué allumáu apagar, asina como la hora dende la cual executar la midida d'aforru en casu de que consideren afayaízo recortar una rede d'allumáu qu'en munchos casos foi pagada orixinalmente polos propios vecinos y vecines.

Consideramos inaceutable qu'una midida qu'afeuta de manera frontal a les vides de los vecinos y vecines nun cunte cola so participación, y de fechu por ésti motivu les quexes son xeneralizaes: l'únicu criteriu emplegáu foi l'económicu, a cargu de téunicos a la gueta d'aforrar perres a un Ayuntamientu afogáu poles deldes provocaes por años de despilfarru y caciquismu, y suprimiéronse dafechu les considerances humanes y de bientar social.

El perxuiciu que causa la midida nun ye quién a compensar los 150.000 euros que supuestamente s'aforren cola midida, puesto qu'esiste una bayura d'estayes nes que poder aforrar perres. La situación económica del conceyu ye mala, tien culpables, pero dende llueu nun son los ciudadanos y ciudadanes del conceyu. Son los políticos y polítiques que desendolcaron un programa destináu a los sos intereses y los de les élites sociales, escaeciendo una xestión racional y honesta d'un órganu qu'a fin de cuentes financiámoslu toos y toes pa que mos apurra los servicios que demandamos y que-y competen.

Poro, dende Conceyu Abiertu por Uviéu proponemos dos custiones p'aidar a la igua d'una torga que tien nel Ayuntamientu al únicu culpable:

-Revisión de les polítiques del Ayuntamientu pa colos servicios "públicos" qu'ufierta: Con práuticamente toles estayes decisives privatizaes dafechu o baxo concesiones, ye evidente que lo que prima ye la rentabilidá económico y non la calidá o efeutividá de les mesmes, lo qu'afeuta especialmente a les zones rurales pola so dispersión y baxa concentración poblacional. Ye por ello que creyemos imprescindible la revisión d'éstes polítiques y la torna de les mesmes al dominiu públicu ya'l criteriu del bientar social. Lo público ye meyor y más barato, y n'Uviéu ta l'exemplu perfeutu.

-Decisión consensuada alrodiu de los recortes nel allumáu: Dende Conceyu Abiertu por Uviéu proponemos la creación d'una mesa de trabayu na que los representantes del Ayuntamientu aconceyen colos representantes de los vecinos de cada zona rural, que llevarán les sos propuestes y oxeciones al consistoriu tres aprobación en conceyu abiertu o cualquier otra fórmula asamblearia previa pol conxuntu de les distintes poblaciones. Por supuestu, l'enfotu sedría que l'Ayuntamientu ficiere casu a toles peticiones populares, non dexar la mesa nun meru instrumentu consultivu.

En definitiva, dende ésti movimientu ciudadanu sofitamos dafechu a los vecinos y vecines afeutaes, y reiteramos una vegada más qu'ensin participación popular nun hai manera d'evitar les problemátiques derivaes de les evidentes carencies nos servicios básicos d'Uviéu, tanto pa la población urbana como pa la rural, anque n'especial pa ésta cabera, en cuyu casu les deficiencies son más sensibles.

Pela nuesa parte creyemos que naide meyor que'l pueblu conoz cómo distribuyir les modificaciones nel allumáu, polo que refugamos la fecha dende l'Ayuntamientu de manera xunillateral.