Conceyu Abiertu

Tocántenes al PRIMER PUNTU del orde del día, ESPEDIENTE DE MODIFICACIÓN PRESUPUESTARIA n21/2011, queremos espresar lo siguiente:

1) Entendemos que seya necesario facer la modificación pa nun perder la posibilidá de pagar les factures que debe l’Ayuntamientu (les recibíes fasta'l 30/11/11, incluyendo 5 factures pendientes del 2010 que nun se recoyeron nel créditu ICO pidíu y escluyendo 80.000€ que se deben a CADASA). El dineru sal básicamente de créditos yá amortizaos, de partíes relacionaes cola policía llocal, que, o yá se ficieron o sobraron esti añu, y tamién del aforru en sueldos de los políticos (¡unos 70000 euros en 6 meses!). Esto pon de manifiestu lo bono que ye pa les cuentes de Noreña que los políticos nun sangren les arques municipales yá que, prácticamente,  con dexar de cobrar o contener fuertemente'l gastu nos dos años anteriores fácilmente se finaría l'añu con un saldu positivu, o poco negativu. Agora bien, facer esta modificación ye por cuenta de que se trabaya con un presupuestu prorrogáu por cuenta de que l'anterior gobiernu municipal nun foi a cuadrar, nin a aprobar les cuentes del 2009. Amás, al parecer, naide tien la culpa d'esa situación y naide ta buscando responsabilidaes.

2) Por otra parte, tamos fartos de qu'esti gobiernu municipal nun convoque más que plenos y comisiones pesllaos al debate políticu col únicu conteníu que'l que por llei se desixe refugando cualesquier tipu de debate d'otres propuestes. Hasta agora namás hai torgues, llargues y escuses pa nun entrar a debatir. Esti plenu ye un nuevu exemplu de falta de modales democráticos dao que se presenta una modificación a última hora y pa pagar custiones que yá tan gastaes.

3) Con too ello, Conceyu Abiertu por Noreña manifestamos que tamos pa facer política y pa debatir propuestes con tol mundu y pa evitar que situaciones de caos contables como la que se dio na llexislatura pasada se solucionen y nun vuelvan a pasar, pero ta claro que pa eso ye necesario entrar en un procesu de depuración de responsabilidaes que nun figura per dengún llau. Conceyu Abiertu vamos a abstenemos nesta votación recordando qu'esta modificación nun sería necesaria si’l gobiernu municipal, qu’hai que recordar que cobraben unos buenos dineros por "atender" l'Ayuntamientu, fixerere’l so trabayu.

Tocántenes LOS DOS PUNTOS SIGUIENTES, INFORME CUENTA XENERAL 2009 y 2010, queremos espresar lo que sigue:

1)  Amás de lo mentao anteriormente, que tamién tien validez equí, hai que remembrar que tar cuasique nel añu 2012 aprobando les cuentes de 2009 nun ye normal y qu'eso tuvo consecuencias graves como son funcionar con  presupuestos prorrogaos, sanciones qu’impliquen perda de lliquidez al demorar el cobru d’impuestos que caltienen l’ayuntamientu (la contribución), endeldar el Conceyu o tener qu’acabar pidiendo a créditos ICO (con un 6% recargu)... Too ello consecuencia de una mala xestión como queda claro al lleer l’Informe d'Intervención, mala xestión que nin s'asume, nin se piensa  siquiera n’esclariar o depurar responsabilidaes.

2)  Pa Conceyu Abiertu por Noreña esti comportamientu de tirar p'alantre y dexar qu'el tiempu  cubra los erros nun ye nin válidu nin ye sanu, asina que nun podemos votar  favorablemente a unes cuentes, de les que nun duldamos que tean bien echaes pol interventor pero que mos gustaría refrendar namás en casu  de que les razones y responsabilidaes que correspuenden queden esclariaes.

3) Faciendo constar espresamente que queremos que s'aclaren les responsabilidaes, votaremos abstención anque casi más mos apetez  llevantamos y marchar. Damos vergoña axena que'l responsable d'unes circunstancies tales como estes, con un caos contable y  financieru por una mal control de les cuentes lo primero y por un escesu d'avaricia colos sueldos de los políticos lo segundu, nun asuma la so responsabilidá. Pareznos un  espectáculu vergoñosu que no pide menos que la dimisión.

Share Link: