Conceyu Abiertu

El gobiernu central vien d’anunciar va unos díes, al traviés de la Secretaría d’Estáu d’Alministraciones Públiques, la so intención de suprimir les mancomunidaes, órganos de calter supramunicipal, amás de dexar abiertes les puertes a una reforma que permita la desapaición d’Ayuntamientos mediante la so fusión con otros. A ello hai qu’amestar la reciente midida d’eliminar el 30% de les conceyalíes anguaño esistentes.
Dende Conceyu Abiertu queremos amosar el nuesu refugu a estes midíes, y ye que suponen un ataque a la estructura municipal afitada nel nuesu país, asina como una agresión haza los trabayadores d’estos organismos, qu’en munchos casos perderíen el so puestu de trabayu.

Les mancomunidaes son ferramientes válides coles que puxar pola solidaridá ente conceyos, amestando recursos humanos, económicos, etc. pal desendolcu de proyeutos comunes. De la mesma manera, ye cierto que n’actualidá esisten delles mancomunidaes ensin usu o en procesu de desaniciu pola falta d’interés de les Cases Conceyu implicaes o por una mala xestión, pero dende Conceyu Abiertu puxamos por un procesu de remocique qu’equilibre y faiga verdaderamente útiles, eficientes y granibles pal ciudadanu esti tipu d’instituciones, refugando en cualquier casu la so supresión dafechu.

En cuantes a la posibilidá de desaniciu d’Ayuntamientos mediante la so fusión, dende Conceyu Abiertu camentamos que ye más qu’evidente qu’esti tipu de custiones nun pueden ser trataes nin aplicaes de mena xenérica pa tol territoriu del estáu, puesto que cada comunidá cunta colos sos fechos diferenciales en materia territorial, les sos distintes maneres de distribuyir el territoriu, etc. Nel casu asturianu, la posibilidá de fusionar conceyos supón otru ataque a la cadarma territorial tradicional n’Asturies, mui xunía a la esistencia de los gobiernos municipales, y otru perxuiciu pa los trabayadores públicos, porque de xuru que pel camín despedirán a cientos d’ellos p’amenorgar les alministraciones públiques.

Lo mesmo camentamos respeuto a la supresión del 30% de conceyales nes Cases Conceyu, onde se va crear una situación de perxuiciu pa les fuercies minoritaries nos Ayuntamientos de menor tamañu, que veríen desaniciada la so representación creando en munchos casos una composición monocollor de les conceyalíes nos conceyos.

Poro, el gobiernu estatal ta plantegando un remocique del modelu municipalista que se basa nel so progresivu desaniciu, ensin importar el llabor averáu a los ciudadanos y ciudadanes que realicen estes instituciones nin la so utilidá como ferramientes pa promover la democracia participativa pente la ciudadanía. La mala xestión fecha pola clas política de les nueses Cases Conceyu nun debe ser iguada col so desaniciu, sinon con un cambeu de modelu nel que la ciudadanía cunte con participación direuta na xestión y toma de decisiones del gobiernu llocal, o lo que ye lo mesmo, averar inda más les instituciones al pueblu, y non el camín contrariu que plantega’l gobiernu del PP.

En definitiva, tamos a favor de remocicar l’actual modelu, pero non a costa de perder pel camín instituciones, puestos de trabayu, y ferramientes con gran potencial de serviciu y utilidá pal ciudadanu. Dende Conceyu Abiertu puxamos pol mayor poder popular nos Ayuntamientos como mena d’iguar los despilfarros, corrupciones y demás cáncanos que debiliten les nueses instituciones.

Share Link: