Conceyu Abiertu

Dende la formación ciudadana Conceyu Abiertu por Sieru venimos percibiendo dende va selmanes a la formación de vertederos improvisaos, de pequeñu tamañu pero bien visibles y accesibles en zones averaes principalmente a Llugones y El Carbayu, básicamente en territorios de calter rural y averaos a zones de vexetación, onde dalguna xente aprovecha pa dexar tiraos los sos desfechos, que pueden comprender dende plásticos a caxes de fruta, colchones o televisores.

Ello algama una especial gravedá en zones averaes al Ríu Nora, onde l’impactu d’esti tipu d’acciones ye inda mayor tanto a nivel visual como mediuambiental. Poro, dende Conceyu Abiertu por Sieru treslladamos a la Casa Conceyu dicha problemática pa que ponga igua a estes acumulaciones de basoria, asina como tamién queremos poner esta problemática en conocimientu de tola sociedá sierense, pa evitar na midida de lo posible la degradación del nuesu mediu natural.

Al Ayuntamientu vamos a encamentá-y non sólo a que se llimite a retirar los vertíos ensin más consideraciones, sinon que tamién queremos proponé-y los siguientes aspeutos:

1)      Colocación de señalización alvirtiendo de la prohibición de verter basories n’aquelles zones sensibles a ello qu’inda nun cunten con ello, como midida informativa, y siendo conscientes de qu’ello sólo nun igua’l problema.

2)      2)   Dende otru prisma, camentamos que la esistencia d’esti tipu de vertíos tien orixe nuna custión educativa y de falta de concenciación social y mediuambiental de dellos seutores de la sociedá, polo que proponemos la puesta en marcha d’aniciatives de concenciación en centros educativos, cases de cultura, places públiques, etc. Pa ello podría recurrise a la collaboración de COGERSA, o incluso del texíu vecinal y asociativu del conceyu, que de xuru taría dimpuestu a collaborar nuna aniciativa en beneficiu de la sociedá y que tendría un costu mínimu pa les arques municipales si s’algama dicha implicación social, ello por nun mencionar l’aforru posterior evitando la llimpieza d’estos vertíos.

Ensin más, confiamos na igua d’esta problemática qu’afeuta sistemáticamente a zones del nuesu conceyu, dende una perspeutiva constructiva d’una situación que ye perfeutamente solucionable si toos y toes, instituciones y ciudadanía en conxuntu, nos implicamos na defensa y caltenimientu del nuesu entornu.

Share Link: