Conceyu Abiertu

Nos caberos díes conocimos los problemes económicos colos que s’atopaba Jovellanos XXI, empresa propiedá de les families Cosmen y Lago que ye propietaria de los tarrenes onde s’atopen tantu’l complexu diseñáu por Calatrava en Buenavista, como la parcela de l’antigua estación del Vascu. Asina, la empresa entró recientemente en Concursu   d’Acreedores, fechu que, polo que paez, nun afectará de momentu a la so actividá.

Sicasí, dende Conceyu Abiertu por Uviéu creyemos qu’esta situación de dificultá económico ye un bon reflexu del fracasu d’una enquivocada y poco equilibrada xestión urbanística del Ayuntamientu d’Uviéu, que como n’otres tantes estayes de la Casa Conceyu, primó l’amiguismu y l’apurrir beneficiu económicu al seutor priváu averáu a la élite política del nuesu conceyu, qu’en desendolcar una proyeición urbanística enfotada nel ciudadanu, n’apurrir más y meyores servicios y, sobre too, en nun favorecer nin promover la especulación con suelu público vendío a preciu saldu, si lo comparamos col beneficiu que va a algamar Jovellanos XXI cuando termine, por exemplu, la construcción nos tarrenes del Vascu.

Asina, queremos denunciar públicamente al partíu executor d’esta llaceriosa política urbanística, el PP, que col so neolliberalismu ranciu mercantiliza toles estayes del nuesu conceyu, dende servicios públicos básicos como la llimpieza, el tresporte, l’augua, les instalaciones deportives, infantiles,e tc., hasta’l mesmu suelu públicu, que práuticamente regala a empreses collacies pal so propiu beneficiu económicu del que los ciudadanos y ciudadanes d’a pie nun vemos nada.

 Y ye que, por muncho que mos quixeron vender les bondaes del “Calatrava” como centru pal puxu del turismu asturianu mediante congresos, visites, etc., la realidá ye que’l nuesu conceyu nun ve un beneficiu tan nidiu como’l conseguíu poles empreses executores de los proyeutos, demientres que’l seutor industrial mengua día a día, polo que consideramos al Ayuntamientu como responsable de la execución d’un modelu urbanísticu enquivocáu, desfasáu, y malu pa la economía municipal.

Poro, dende Conceyu Abiertu por Uviéu puxamos por un cambeu radical na xestión del urbanismu uvieín, debiendo basase dende yá nes necesidaes ya intereses de les clases populares del conceyu, y nunca enxamás nos intereses especulativos empresariales. Pa qu’ello pueda ser posible, ye imprescindible que quien actuó a les sos anches y con total impunidá, tea condicionáu dafechu pola participación ciudadana, pola democracia direuta qu’acabe con esti tipu d’amiguismos y especulaciones.

D’ehí que la Casa Conceyu, pesie a muncha pallabrería, nun quiera baxo nengún conceptu fomentar la participación ciudadana, sinon que prefiera siguir faciendo y desfaciendo según los sos intereses y los del so entornu.

Share Link: