Conceyu Abiertu

La Casa la Cultura de Grau foi ayeri l'escenariu de la presentación de Conceyu Abiertu, un movimientu políticu qu'axunta a persones de diferentes sensibilidaes d'izquierda y que propón la democracia directa nel ámbitu llocal, recuperando los tradicionales conceyos abiertos nos que les decisiones son alcordaes polos vecinos ensin intermediación de los partíos o representantes políticos. Al actu acudieron vecinos de Grau y miembros d'esti nuevu movimientu políticu, qu'esplicaron la institución del conceyu abiertu a los presentes y les sos ventaxes p'afondar na democracia participativa y evitar la corrupción y la toma de decisiones al marxe de los intereses comunales.

Mientres el trescursu del mesmo recoyéronse les aportaciones de los asistentes y les sos esperiencies y resumióse'l Manifiestu de Conceyu Abiertu por Grau. Esti Manifiestu esplica les bases del movimientu y que, sintéticamente son les siguientes:

• Potenciar les asamblées vecinales y la democracia directa

• Desprofesionalización de la política Autonomía de los municipios

• Candidatos electos nes corporaciones son mandatarios de les asamblées vecinales y nun tomen decisiones pola so cuenta

• Potenciar el referendum llocal y la iniciativa popular llexislativa

• Facer presupuestos participativos

• Capacidá de les asamblees vecinales pa revocar cargos ellectos

• Cambiu del modelu productivu y movilización social p'acabar col paru

• Conservar el patrimoniu cultural asturianu y la so llingua

• Ecoloxismu activu y defensa del medioambiente

Share Link: