Conceyu Abiertu

Cerca d'un centenar de persones allegáronse al actu del CUPX en Begoña

El Conceyu d'Unidá Popular de Xixón presentó ayeri nel Paséu de Begoña, na cai, la so candidatura y propuestes pa les elecciones municipales. Como yera d'esperar, los medios de (des) información del réxime apenes se fixeron ecu de la noticia. L'eventu foi pocu protocolariu, nada de mítines personalistes con somníferes parlotaes del líder de vez, o con conseñes fáciles que busquen l'aplausu, el CUPX ayeri denunció la situación que vive'l pueblu trabayador en Xixón y realizó propuestes concretes de llucha. L'actu foi siguíu bien de cerca por dos llecheres de la Policía Nacional.

L'actor David Acera, a quien estimamos la so collaboración, fixo de maestru de ceremonies y presentó a los candidatos y candidates, un total de 30 muyeres y homes lluchadores, dalgunos de tola vida como la cabeza de llista Boni Ortiz, o como Cándidu Carneru que nun ta na llista porque la xusticia" nun-y dexa. Sí, anque Cándidu y Morala yá nun tán ente rexes, los sos derechos ciudadanos entá nun tán restituyíos, nun van poder votar, nun pueden ser escoyíos, esa ye la verdadera cara d'esta democracia.

La llista del CUPX cunta con sindicalistes como Mª Jesús Suárez de la CSI que denunció na so intervención los retayos y la destrucción d'empléu sufierta nos últimos años en Xixón, la desapaición de los Estelleros y los socesivos incumplimientos de reapertura de Xuliana. Tamién faló Jesús de Raspiar, profesor y sindicalista de SUATEA qu'esplicó los retayos sufiertos na enseñanza y la sanidá como l'antoxana qu'anuncia un secretu a voces: la privatización de los pocos servicios universales que nos queden. Xuntu con él, Miguel Angel Llana, activista y ceador de www.asturbulla.org que conoz bien la realidá xixonesa y dende los sos escritos recueye les verdaes que naide cunta. Otru lluchador qu'intervieno foi Lleo García, el voceru de la plataforma contra la regasificadora d'El Musel, quien denunció l'actitú del conceyu cola implantación de la regasificadora, que nin consultó, nin informó a los vecinos y vecines sobre la so construcción, nin sobre los posibles efectos na salú.

Nel CUPX tamién hai lluchadores y lluchadores de nuevu cuñu, un sector nuevu qu'asegura'l relevu xeneracional de la esquierda anticapitalista y combativa. Unu d'ellos ye Xesus Nel García que faló dende'l corazón, un corazón que llate n'asturianu y defende la identidá d'un pueblu. Tamién David Álvarez, trabayador precariu que denunció los retayos sociales, y la necesidá d'ameyorar la cobertoria social na ciudá. Con cares femenines el CUPX presentó a Verónica Rodríguez, trabayadora de la FMC que denunció la situación de doble esplotación que viven les muyeres trabayadores y les propuestes de meyora que de los servicios de los cuidos desenvuelve'l programa.

El broche final pusiéronlu Javier Cubero que faló en nome de Conceyu Abiertu, José Enrique Fernández pol Frente de la Izquierda y Boni Ortiz por Ezquierda Anticapitalista Asturies, les organizaciones polítiques que sofiten el CUPX. Los trés incidieron na necesidá de xunir fuerces, de sentar les bases pa construyir piedra sobre piedra un camín de llucha, de denuncia del capitalismu porque como dicía Bonaventura Durruti llevamos un nuevu mundu nos nuesos corazones.

Share Link: