Les persones qu'integramos Conceyu Abiertu por Llangréu esiximos que se ponga fin a les duldes alrededor de los fondos públicos que se destinaron a la empresa llangreana nel so día. Llevamos asistiendo durante munches selmanes a escuses por parte de los políticos y patronos sobre'l casu de los fondos públicos qu'ingresó la empresa nel so aniciu.Amás, el Conseyeru d'Industria del PSOE, Graciano Torre lleva munchu tiempu dexando a los y les trabayadores nuna situación d'indefensión y de nun saber un res sobre'l so futuru.
Conceyu Abiertu camienta qu'esta nun ye una situación d'anormalidá por parte del PSOE llocal y asturianu, que “sospechosamente” siempres perxudica a los trabayadores en situación de conflictu llaboral, bien dando-yos soluciones insuficientes o direutamente poniendose a la escontra de les vindicaciones de los trbayadores en crisis. Dende Conceyu Abiertu por Llangréu amás caltenemos una postura percrítica con esta situación, y mos entrugamos si el PSOE nun ta tratando d'aguantar el conflictu hasta dempués del 22 de mayu, pa dempués de los comicios eleutorales “da-yos la patada” definitiva a los operarios d'esta empresa. La busqueda d'inversores ya ta diendo pa llargu, nun sabiendo cual sedrá'l futuru de la empresa. El Gobiernu llocal entá nun demosó un sofitu claru a estes y estos trabayadores, camudando incluso d'opinión en mediu d'un plenu municipal. Dende Conceyu Abiertu por Llangréu sofitamos a los trabayadores nes sos movilizaciones y llamamos a la solidaridá del pueblu llangreanu. Tamién queremos tresmitir la idega de que colos que llevan 30 años faciendo lo que quieren con Asturies nun vamos pol bon camín, solo pol camín de la precariedá, la reconversión que nunca ocurrió y la emigración forciada. Nun se pue siguir con esta mentalidá, debemos de camudar. Tenemos qu'entamar a recuperar la nuesa dignidá como conceyu, organizandonos y creando ferramientes que sirvan como muerganos de tresformación social, en defensa de los nuesos drechos coleutivos y les nueses espectatives de futuru.
|
Share Link: 
ConceyuAbiertu
